“मुना मदनको सम्बन्ध विच्छेद” – कविता

१४० पटक पढिएको

सी.जी. “निर्मलश्री”

अब त ऊ
हिँडिसकेको रहेछ
तर सम्हालेर हैन
टुटेर,
अनेक कुण्ठा मनमा
बोकेर हिँडिरहेको रहेछ
अनवरत र अज्ञातबासतिर हिँडिरहेछ ……??

के दिएको
थिएन र उसले उनलाई
सबै थोक दिएको थियो
आफ्नो प्रेम, आफ्नो भरोसा,
आफ्नो वफादारिता
उसको हरेक मुस्कुराहटमा
उनकै नाम त थियो
उसको हरेक प्रार्थनामा
उनको सुस्वास्थ्यको कामना थियो
ऊ चाहन्थ्यो,
केवल एउटा साँचो सम्बन्ध
जहाँ प्रेम !
केवल एउटा शब्द हैन
एउटा एहसास होस्
मुटुभित्र धड्किने धड्कन होस्
जहाँ भरोसा, चाहना, कल्पना,
कुनै बोझ नबनोस्
ऊ केवल उनको
दिल जोड्ने एउटा
पूल बन्न त चाहन्थ्यो…………
..
..
..
तर !
बदलामा उसले के पायो र ?
“तँ धेरै भएको छस्”
ऊनीबाट अव्यक्त यिनै शब्दहरु
उसको आत्मामा बिझ्दै गयो,
चुभ्दै गयो,
कहिले भावुक हुँदै गयो,
कहिले
आवश्यकताभन्दा बढी संवेदनशील
कहिले आफूभन्दा बढी चाहने
आफैले उनीसँग गरेको प्रेम
कतै गल्ती त भएन ………..???
तर !
यथार्थ त यो थियो
त्यो प्रेमको समर्पण ज्यादा थिएन
त्यो प्रेम सत्य थियो
यति सत्य कि एउटा अपूर्ण
व्यक्तिको लागि सम्झिन नै कठिन थियो
ऊ प्रेममा समर्पण चाहन्थ्यो
स्थिरता चाहन्थ्यो
तर उसलाई अनेकन्
समस्यामा उल्झ्याइन थालियो
उ समस्या निराकरणको कोसिस चाहन्थ्यो
तर अनेकन् बहानाले चुप गराइयो
ऊ दिगन्तसम्म प्रेम चाहन्थ्यो
तर उसलाई भावनात्मक
युद्दको मैदानमा उतारिएको
युद्दबन्दी बनाइयो
हरेक पटक
जब उसले आफ्नो चाहना व्यक्त गरेर
आफ्नो मुटुको टुक्रा
उनलाई समर्पण गर्न चाह्यो
तर बदलामा उसको
हरेक चाहना
तोडेर उसैको खाली हातमा राखियो…………
..
..
..
र अब
उनी हिँडिन् क्षितिजभन्दा टाढा
उसलाई छोडेर
कुनै बदलाको भाव बोकेजस्तै गरि
कुनै परचक्रीलाई साथ लिएर
प्रेम गर्दै गर्दै उसले धेरै गुमायो
गुमाउनु नै उसको नियती बन्दै गयो
उनी त छोडेर गईन्
आफूलाई फाइदाको गणितीय हिसाब
थप्दै गईन्
तर उसको मुटु टुक्रा टुक्रा पारेर गइन्
तर ऊ
के नै गर्न सक्छ र लाचार
न आफ्नो आत्मालाई फेरि जोड्न सक्छ
न आफ्नो ठेगानालाई
फेरि सम्हाल्न सक्छ
केवल छोडेर जाने
परचक्रीको साथ दिन हतारिएकी
आफ्नी कल्पनाकी मुनालाई
न त भुल्न नै सक्छ
न त फेरि सम्पूर्ण बनाउन नै
केवल सोच्न बाध्य छ उ
उनी उसको लागि खास थिइन्
बहुत ज्यादा नै थिईन्
सर्वप्रिय नै थिइन्
तर केवल समय गलत थियो
मुनाको लागि खुशी किन्न गएको मदन
सम्पूर्ण खुशी दिने लालसामा
आफू सकिदै गयो
तर आफ्नी मुना
त्यही मदनलाई सुकाउँदै सक्काउदै
अरु कसैको प्रिया हुँदै गइन्
र बुझ्दै गयो बल्ल उसले
“धेरै सस्तो रहेछ मुनाप्रति गरिएको प्रेम”
आधुनिक मुनाहरु
मदनको आत्मीय प्रेम हैन
मदनको दिल भित्रको प्रेम हैन
कुनै धनवानको लालसायुक्त
प्रेममै आशक्त हुन्छन् ….!!

यहाँ “ऊ” कल्पनाको मदन हो भने “ऊनी” लेखिएकी कल्पनाकी मुना हुन्।

चतुर्भुज गौतम
टीकापुर, १ कैलाली
हाल : मणिग्राम रुपन्देही